Məhəbbət - Mənsur şeir
- Ana Səhifə
- Məhəbbət - Mənsur şeir
Məhəbbət - Mənsur şeir
Papağını başına qoyub dedin:
– gedirəm...
Gözümdə dünya qaraldı. Dünya. Ürəyim əsdi. Ürəyim gizildədi. Ürəyimdən
nələr keçmədi, nələr!.. Yazıq ürəyimdən, bəlalı, cəfalı ürəyimdən. Ah, bu sözü
mən gözləyirdim. Əvvəl-axır deyiləcəkdi. Geci-tezi vardı. Deyiləcəkdi... Güclə
özümü ələ aldım. Özümü sındırmadım. Sındıra bilmədim.
– Get, - dedim, - get!
Gözlərimə baxsaydın «getmə!» oxuyardın, «getmə!»
Ancaq sən baxmırdın, gözlərin yerə dikilmişdi.
Dedin:
– Unut. Hər şeyi unut!..
Düşündüm: «Bu tezlikdə?! Ağır olmazmı?! Nə dediyini duyursanmı?!».
Dedim:
– Çalışaram, unudaram!
Dedin:
– Bağışlamağa... bağışlamağa necə, söz verirsən?!
Yandım. İçin-için yandım. İlahi, insan necə də davamlı, necə də dözümlü
olurmuş. Dözdüm. Yana-yana dözdüm. Dözüb də xəfif bir təbəssümlə, yox-yox,
saxta, yapma bir təbəssümlə dedim:
– Verirəm!.. Bağışlamağa söz verirəm!
Getdin...
Saxlaya bilmədim. Saxlaya bilməzdim. Məhəbbətini uçurmuşdum.
Məhəbbətini! Özünü saxlamağın mənası vardımı?!.
28 iyul, 1966